我教爹去寻媒话你个郎。六十岁做做亲八十岁死。还有二十年夫妇好风光。
囡道娘呀。我也弗慌来也弗忙。也弗要爹去寻媒话我个郎。爹爹也弗要来娘房里去。哥哥也弗许听个嫂同床。
争娘弗过听个外婆争。你几岁上贪花养我个娘。娘几岁上贪花养子我。小阿奴奴几岁上养外甥。
外婆道。囡儿弗要听我争。我十六岁贪花养子你个娘。娘十七岁上贪花养子尔。外甥十八正当争。
一云。
外甥囡儿再听外婆争。侪是尔贪花生出子我个娘。我里个娘贪花养子我。教我贪花惊后生。
更好。
[补肩头]
新做海青白绵绸。吃个喜虫哥咬破子个两肩头。隔壁个姐儿有介双红膝裤。借来我补子两肩头。
姐道弗识羞弗识羞。罗见红膝裤补来两肩头。咳嗽吐痰就得知你个痰里病。要阿奴奴两脚上肩头。
[老人家]
结识私情没结识个老人家。老人家做事慢他他。后生家见子人来三脚两步闪开子去。老人家还要的的搭搭摸蒲鞋。
一云。
结识私情只结识个俏后生。豁得窗盘跳得墙。一声响觉人在房门外。罗帐内无人好听渠争。
即此意。
又
结识私情等结识个老人家。先弗为跳槽吃醋上结子闲冤家。别人只道是多年尊长空来往。罗道老人家原有老奢遮。
[暴后生]
结识私情没要结识暴后生。渠好似新出螃蟹无肚肠。新造庙堂团团里介画。清明插柳遍传扬。
【打 印】 【来源：读书之家-dushuzhijia.com】
